Татарстан гасыры
«Татарстан гасыры» – белем бирү максатыннан төшерелгән һәм Татарстан Республикасына багышланган беренче халык анимацион проекты. Аны төшерүдә Татарстанның 7дән 15 яшькәчә булган 30000 мәктәп баласы катнашты. Фильм ТАССРның 100 еллыгын бәйрәм итү уңаеннан эшләнде. Конкурс нигезендә, балаларның 2500дән артык рәсеме, 500 шигыре сайлап алынды.
«Татарстан гасыры», иң күп авторлар катнашында төшерелгән анимацион фильм буларак, Россиянең Рекордлар китабына кертелде.
Фильм телевизион тамаша форматында төшерелде һәм аны Гера исемле Геральдика һәм Лалә исемле Символика алып бара. Геральдика һәр нәрсәне фәнни яктан аңлатса, Символика сәнгатьне яхшы белә. Алып баручылар, дусларча әңгәмә барышында, бер-бер артлы Татарстан Республикасының муниципаль районнары һәм шәһәр округлары гербларына багышлап балалар ясаган рәсемнәрне тәкъдим итәләр.
Фильм, оригиналь музыка барышында, Татарстан Республикасы гербын каршылау белән тәмамлана.
