Татарстан гасыры
«Татарстан гасыры-2» – белем бирү максатыннан төшерелгән беренче халык балалар анимацион проектының дәвамы. Татарстан Республикасы дәүләт телләрендәге бу проект ТАССР төзелүнең 100 еллыгын бәйрәм итүгә әзерлек чаралары кысаларында эшләнде.
Гаять киң колачлы бу проектта 7 дән 15 яшькә кадәр булган 32000 Татарстан укучысы катнашты. Балалар яраткан республикабыз турындагы анимацион фильмның авторлары булдылар.
Проект кысаларында Татарстанның һәр районында укучылар өчен «ТАССР төзелүнең 100 еллыгын каршылап» дигән темага тарих, ватанпәрвәрлек һәм дәүләтчелек дәресләре, видео-дәресләр анимация, иллюстрация буенча мастер-класслар үткәрелде.
Традицияне дәвам итеп, фильм телевизион шоу форматында төшерелде. Аны Геральдика белән Символика алып бара. Гера төгәллек һәм фән яратса, Лалә сәнгать һәм мәдәниятне үз итә. Алар балаларның Татарстан районнарының, шәһәр, бистә яки авылларының тарихи-мәдәни, архитектура, табигать истәлеклекләренә багышланган рәсемнәрен һәм шигырьләрен тәкъдим итәләр.
Республикабыз районнары һәм шәһәрләренең барлык рәсем һәм шигырь авторларының һәм проект координаторларының исемнәре анимацион фильм титрларында күрсәтелде һәм «Татарстан гасыры-2» халык проекты белән бергә тарихка кереп калды.
